Aktualitete. Temat e ditës

 Kanadaja, vendi ku shqiptaret kerkojne te emigrojne 

 Hemoragjia e intelektualeve shqiptarë duket se nuk ka të ndalur. Kanadaja përbën fushën manjetike më të fortë që drejton këtë rrjedhje. Kështu në Kanada komuniteti shqiptar, sipas statistikave, numuri i shqiptareve te emigruar eshte rritur shume vitet efundit, duke patur parasysh ketu edhe faktin se 40% e tyre janë intelektualë, madje persona që në vitet ’90 ishin drejtues të institucioneve shtetërorë në Shqipëri. Florian Dangëllia është mjeku ligjor i njohur prej shtetit Kanadez, i cili përpilon formularët mjekësorë që çdo person duhet të plotësojë përpara se atij t’i jepet green-card Kanadez. Sipas dr.Dangëllia, nga viti 1993 deri ne vitin 1999 numri i familjeve të larguara nga Shqipëria është 1836. Dangellia tha se, për vitin 2000 numri i familjeve të larguara është 550, ndërsa për periudhen janar - qershor 2001 numri i familjeve që kanë kryer këtë procedurë është 312. Shifrat e mësipërme nuk përbëjnë numrin e përgjithshëm të shqiptarëve të larguar në drejtim të Kanadasë, pasi në këto shifra nuk përfshihet numri i personave të larguar në mënyrë ilegale. Gjithashtu ne kete informacion nuk perfishihen personat që kanë kryer këtë procedurë me një mjeke tjetër e cila ka punuar për një kohë të shkurtër paralelisht me doktor Dangëllinë. "Loja" e Kanadasë i ka fillimet e veta në vitet 1991-1992. Dikur avokatët kanadezë të specializuar në emigrim kishin për qendër të tyre hotel "Dajti". Sot rreth 8 kompani kanadeze që operojnë në këtë sektor e kanë perfeksionuar punën e tyre duke shtuar zyrat, si dhe personelin e tyre me shqiptarë. Dikur shqiptarët ishin skeptikë karshi avokateve te huaj. Druheshin se mos humbisnin paratë e tyre, apo u dukej e pamundur që ata duke qenë ne Shqipëri të paiseshin me një green-card Kanadez. Në të njëjtën kohë shumat prej 1000 -2000 dollare,(kosto e veprimeve), ishin marramendëse për atë kohë. Largimi i familjeve të para në ’92-’93-in rritën besimin e popullsisë se Kanadaja nuk është një ëndërr por një realitet i kapshëm. Rritja e nivelit të jetesës dhe e të ardhurave bëri që në fund të viteve ’90 kërkesat për emigrim të shtoheshin shumë. Sipas përfaqësuesit të ESP-Alb Canada volumi i punës është ritur shumë për t ’iu pergjigjur disa limiteve kohore që kjo procedurë kërkon. Këtë fakt e provojnë edhe shifrat e të larguarve nga viti në vit. Shifrat tregojnë se për çdo vit rritja është në progresion gjeometrik. Kushtet që duhet të plotësojë një person për t’u paisur me një green-card Kanadez janë të pakta por disi të vështira për t’u realizuar prej kujtdo. Si kusht themelor është diploma e shkollës së lartë, nderkohe qe personi gjithashtu duhet të zotërojë në nivel të kënaqshëm anglishten ose frëngjishten nëse synon të instalohet në provincën frankofone të Quebec-ut. Kusht tjetër është mosha e cila duhet të jetë midis 25- 45 vjeç. Gjithashtu përpara se të paiset me vizë çdo person duhet të transferojë në një bankë Kanadeze të paktën 6000 US$. Emigrimi në drejtim të kontinentit amerikano-verior është një fenomen i vjetër të cilin e ka ndjerë çdo komb i Evropës. Eksperienca e kombeve të tjerë tregon se personat e larguar nuk janë kthyer më por se pozitive, sidomos për ballkanasit, është fakti se ky femomen në të njëtën kohë dhe në mënyrë të pavullnetshme rrit kontaktet me një botë krejt tjetër dhe shumë të civilizuar

Kanadaja, ku po krijohet një mikrokomunitet intelektualësh, që nesër do të jenë një diasporë

Kanadaja zë vendin e parë për emigrim të intelektualëve nga Shqipëria. Njerëz të kualifikuar, njohës të gjuhëve të huaja, kryesisht anglisht dhe frëngjisht, të suksesshëm, por të zhgënjyer nga gjendja sociale në Shqipëri, sakrifikojnë gjithçka për të ikur...

Sakrificat për të pasur një vizë kanadeze në xhep

Çdo e hënë është një ankth i vërtetë për Merita L. Mezi ngre receptorin dhe formon numrin e telefonit të zyrës kanandeze në Tiranë, me frikë se do të marrë të njëjtën përgjigje: "Zarfi juaj nuk ka mbërritur akoma nga Kanadaja". Merita tregon se ka shitur shtëpinë dhe prej 3 vite e gjysmë pret një përgjigje pozitive për vizën kanadeze. "Nuk dua t'ia di për asnjë vështirësi, por ankthi se mos kontinenti i largët nuk më pranon është shumë i tmerrshëm. Së bashku me vjehrrin e vjehrrën flemë në një dhomë e guzhinë, mblidhemi të gjashtë dhe i lutemi zotit: të na japë sa më shpejt vizën kanadeze. Të mos i zë në gojë dollarët e shumtë që kemi harxhuar. Ato i bëjmë hallall vetëm të shkojmë në Kanada". Fati ynë i keq shpjegon Merita është se aplikimi shkoi në fillim në Beograd e pastaj tersi nuk na u nda.
Merita është një ushtare e armatës së madhe të intelektualëve që dëshirojnë të aplikojnë: zotërues të profesioneve të lakmueshme në Shqipëri, që paguajnë 6 mijë dollarë, pa llogaritur shumën e garancisë për në Kanada, që dinë më shumë se 1 gjuhë të huaj, që japin gjithçka kanë për të shkuar drejt një kontinenti të panjohur ku asnjë nuk i pret. Konsulli kanadez në Romë, Ronald Eales* shpjegon se vonesat në procedura vijnë si rezultat i spostimit të vazhdueshëm të zyrave. "Zyra për Shqipërinë u transferua nga Beogradi në Paris në 1 dhjetor 1997. Pastaj, kur në Romë u ngrit një zyrë e pavarur, atëherë përgjegjësia u spostua atje. Në korrik ne kemi intervistuar njerëz që kishin aplikuar 12 muaj më parë. Ne shkojmë në Shqipëri, tregon konsulli, 20 herë në vit për të zhvilluar intervista, por ne gjithashtu inkurajojmë shqiptarët që kanë vizë italiane apo Shengen të vijnë në Romë, pasi afati i pritjes së intervistës mund të shkurtohet nga 12 muaj në 8 javë. Shpresojmë që nga vjeshta e vitit 2001 mesatarja e kohës së procedurave të shkojë në 9 muaj".
Sipas z.Eales, që nga janari deri në gusht 2000, zyra e Romës ka marrë 442 aplikime, që përfaqësojnë 1.204 persona. Shumica e shqiptarëve që janë pranuar të shkojnë në Kanada, janë inxhinierë, agronomë, veterinerë, financierë dhe ekonomistë, profesione këto që përfaqësojnë numrin më të madh.
Po përse intelektualët shqiptarë zgjedhin pikërisht Kanadanë si vendin për të "zbarkuar"? Nga të dhënat e Qendrës së Studimeve Socialekonomike, vëren znj.Zamira Çavo, drejtore e Departamentit Social pranë kësaj qendre, rezulton që vetëm në DHL çdo ditë regjistrohen 10 kërkesa për emigrim në Kanada. "Dhe nëse bëjmë një përllogaritje të familjeve intelektuale, të përbërë nga 3 veta, i bie që gjatë një viti në Kanada të shkojnë rreth 10 mijë shqiptarë intelektualë",- thotë Çavo.
Sipas saj, arsyeja kryesore e emigrimit në Kanada lidhet me sistemin e kontrolluar të emigracionit, që siguron një mjedis të përshtatshëm për intelektualët që venë atje, duke garantuar momentin e parë të jetesës. "Si vend i një demokracie të lartë nuk e konsideron shqiptarin si qytetar të dorës së tretë. Pa harruar edhe faktin se gjatë këtyre viteve në Kanada është krijuar një mikrokomunitet, i cili së shpejti do të marrë formën e një diaspore".
Është fakt se një pjesë e madhe e kandidatëve arrijnë të pajisen me vizë kanadeze, megjithë vështirësitë e procedurat e aplikimit, pa mohuar këtu edhe gabimet, që janë rrjedhojë e mosnjohjes së procedurave dhe afateve të aplikimit. Problemi kryesor për konsullin kanadez në Romë ka të bëjë me informacionin. "Megjithëse informacioni dhe udhëzimet e dhëna nga zyra e Romës dhe e Tiranës janë të qarta, shumë njerëz nuk dinë ku të marrin informacion rreth emigrimit në Kanada. Shumica e tyre joshen nga reklamat në shtypin lokal. Megjithatë qeveria kanadeze mendon se disa prej tyre janë shumë të njohur dhe kanë ngritur firma me reputacion, por të tjerat, për fat të keq, nuk janë të tilla. Një problem tjetër është ai i pagesës: ne pranojmë pagesa në dollarë kanadezë dhe në lira italiane, kurse njerëzit na dërgojnë çeqe dollarësh, të cilat nuk pranohen nga ne",- tregon konsulli kandadez në Romë, Ronald Eales.
Po çfarë i pret shqiptarët në tokën e sapozbuluar? Megjithëse një pjesë e tyre është e suksesshme, fakt është se është edhe një pjesë e zhgënjyer, por asnjë nuk është kthyer në vendin amë. Kontinentit të largët në fillim nuk i interesojnë diplomat, pasi shumica e të emigruarve punojnë jashtë profesionit. Është provuar se shqiptarët kanë aftësi të përshtaten në çdo lloj mjedisi. Për drejtoren e departamentit social pranë Qendrës së Studimeve Social-Ekonomike vështirësi ka, por fakti që numri për në Kanada është rritur dëshmon se këto vështirësi për kalimin e oqeanit duket sikur janë më të realizueshme dhe më praktike sesa në vendet evropiane. "Nga sondazhet rezulton se është vështirë vitin e parë për t'u akomoduar, por pas një viti Kanadaja beson se shqiptarët kanë vërtet aftësi intelektuale, por edhe aftësi profesionale për të konkurruar mjaft mirë me përfaqësues të vendeve të tjera. Nga intervistat që bëhen këtu dhe nga rekomandimet nga përfaqësues të zyrave të emigrimit në Shqipëri, duket se është fituar një lloj besueshmërie, e cila ka nevojë ende për t'u përmirësuar ndaj intelektualëve shqiptarë. Nga informacionet e fundit është shkurtuar periudha e gjetjes së vendit të punës nga 1-vjeçare të 6 muaj e deri në tre muaj e pastaj promovimi për në profesionin e vet e bëjnë pas 3 deri në 6 muaj, kohë optimale për të gjetur vetveten në një shoqëri, që është larg asaj çka shqiptarët kanë jetuar deri në këtë moment",- shpjegon Çavo.
Ndërkohë synohet që lidhjet midis diasporës së ardhshme shqiptare në Kanada dhe tokës amë të mbahen, veçanërisht në Toronto, e cila do të mbisundohet nga një elitë intelektualësh shqiptarë. "Do të studiohet si është akomoduar kjo elitë në shoqërinë kanadeze, në çfarë profilesh, vendesh dhe degësh janë sistemuar dhe pastaj për të parë mundësitë e bashkëpunimit të diasporës me vendin amë, se çfarë mundësish konkrete, teknike e shkencore do të ketë, që kjo diasporë të ndihmojë në zhvillimin e Shqipërisë, me lidhjet që krijojnë, me mundësitë për zgjerimin e lidhjeve si dhe trajnimet reciproke. Nëse ka intelektualë që kanë hyrë në institucionet shkencore, të mundësojnë binjakëzimin apo bashkëpunimin e institucioneve homologe, për t'i dhënë një shtytje të re Shqipërisë".
Dhe nëse nuk arrihet të bëhet një gjë të tillë, atëherë 10 kërkesat çdo ditë do të jenë një humbje e vërtetë e trurit nga Shqipëria. Kanadaja po i fton me kushte shqiptarët, që nesër mund të përzgjidhen si qytetarë të ardhshëm të saj. Ndërsa Shqipëria çdo ditë po braktiset nga njerëzit e arsimuar, që nuk e durojnë dot analfabetizmin ekonomik...

V. Mala (Nga gazeta Shekulli)

Të flasim Shqip me fjalë Shqipe, Anglisht me fjalë Angleze dhe Italisht me ato Italiane ...

Të gjitha gjuhët kanë fjalë të huaja në fjalorët e tyre, mirëpo në gjuhën Shqipe ato janë shumë të tepruara sidomos me fjalët Italiane apo Turke. Kjo për arsye se ne nuk kemi patur studiues të mirëfilltë dhe të mjaftueshëm të terminologjisë as në Shqipërinë zyrtare e as në atë jozyrtare ( Kosovë, Maqedoni, Mal i Zi, Greqi ). Ata pak që kanë qënë kanë punuar nën regjime jo të përshtatëshme ku nuk ka patur konkurencë ose ekonomi tregu. Ata kanë marë një rrogë bazë kështu që puna e tepërt për ta nuk kishte kuptim. Për këtë arsye ndihet një boshllëk i madh në gjuhën shqipe për dhënien e kuptimit fjalëve në shqip ose përkthimin e tyre në shqip apo shpikjen ose zhvillimin e terminologjisë me fjalë të reja, gjë që në gjuhët e pasura është parësore për mbajtjen gjallë të gjuhës në konkurencë me gjuhët e tjera. Një faktor i rëndësishëm për këtë është edhe zhvillimi ekonomik i shtetit dhe shpikja e pajisjeve të reja të panjohura. Psh gjuha angleze kohët e fundit është pasuruar në mënyrë maramëndëse për shkak të shpikjes së kompjuterit dhe shpikjeve të tjera nga amerikanët dhe se termat janë shpërndarë për herë të parë nga ata dhe nga përvoja shohim se ato përdoren po ashtu në pothuajse të tëra gjuhët. Është i dukshëm fakti se shqipja ka qënë një gjuhë konkuruese dhe e pasur për sa kohë që kemi patur nivel gati të njëjtë ekonomik me vëndet fqinjë, psh ne kemi fjalë krejtësisht shqipe si psh shpatë, shtizë, ushtë, rrugë, udhë, ylber, yll, urë, det, lumë, gjah, gjahtar, kishë, këshill, kuvënd, qerre, barkë, plak etj. Siç e shohim të parët tanë kanë mundur ta mbajnë gjuhën tonë gjallë dhe konkuruese derisa filloj zhvillimi i shpejtë dhe "bumi" i shpikjeve të këtij shekulli psh fjala kamion, makinë, avion, veturë, autostradë, manjetofon, radio, inçizim, regjistrim, propozim, komunikim, komunë, legal, ilegal, biblotekë, kompjutër, kasetë, cd, idiot etj. Shkak i prapambetjes ka qënë pushtimi si dhe feja. Psh myslimanët përdornin padashje fjalët që ata i dëgjonin nga hoxhallarët shpesh të ardhur nga Turqia për arsye se ata mbaheshin si njërës të mënçur ose për arsye se ata familjarizoheshin me ato fjalë, psh xhuma = e premte, hiç = asgjë, dyqan = shitore, kasap, kazan etj, si dhe tek emrat psh. ortodoksët dhe myslimanët shqipëtarë vendosin emra grek dhe turq ose arab pasi mendojnë se ato kanë lidhje me fenë ose mendojnë se vetëm ato janë të lejuara nga feja përkatëse. Kjo është krejtësisht ndryshe pasi këto emra janë përdorur në këto vënde para lindjes së Krishtit apo Allaut dhe s'kanë aspak lidhje me fenë, psh. Stavri (o stavros) = kryq, Kosma (o Kosmos) = gjithësi, Vasil (o Voasileas) = mbret, Irini = paqe, Andrea (andras) = burrë, Zoi = jetë, Polizoi = jetgjatë, asllan = luan, etj. Shkak për për këtë ka qënë drejtimi i kishës ortodokse dhe xhamisë nga grek dhe turq apo arab. Dhe kështu që emrat këshilloheshin nga ata pasi "kështu është më mirë për zotin". Prandaj për ata që nuk e kanë kuptuar akoma rrezikshmërinë e kryepriftit pederast "kryeantishqiptarit" Janullatos kanë kohë akoma që të kthejnë mëndje. Në kishën katolike Shqiptare që është drejtuar më së shumti nga priftërinj shqiptarë nuk i ndesh këto veçori. Katolikët shqiptarë janë katolik dhe ata kanë emrat e tyre shqiptarë. Psh Gjergj, Gjin, Ded, Gjon, Llesh, Gjonllesha, Gjonluli, Nik, Prel, Nikprela, Gjok, Lek, Pal, Palush, Gjika etj.

Ndërsa shkak i tanishëm i përdorimit të fjalëve jo shqipe në bisedat shqip është mëndjemadhësia, dëshira për tu dukur ose për të lënë përshtypje (sigurisht ndaj pjesës dërmuese të popullsisë e cila nuk është e shkolluar mirë ose që nuk flet asnjë gjuhë të huaj) pasi nga përvoja shohim se njërëzit që flasin një gjuhë të huaj i përdorin me kursim fjalët e huaja kur flasin shqip, me përjashtim të disa punonjësve të Televizionit Shqipëtar (TVSH) dhe të ndonjë TV apo radio private, në rastet kur ata duan të hiqen të përparuar apo për të tërhequr vëmëndjen, megjithë se zoti e di nëse ia arijnë qëllimit.

Është i papranueshëm dhe prapambetje që mediat, parlamentarët, njerëzit që mendojnë se dinë shumë ose se mendojnë se bëjnë përshtypje duke folur "fjalë të mëdhaja" por që në të vërtetë ata flasin shqip me fjalë jo shqipe dhe nga padija përdorin fjalë që s'kanë lidhje me fjalimin e tyre. Në fakt këto fjalë përdoren nga ata që nuk e njohin mirë gjuhën përkatëse të huaj dhe që nuk janë në gjëndje të bisedojnë në atë gjuhë. Ata që e flasin në mënyrë të mjaftueshme gjuhën e huaj arijnë të bëjnë ndarjen e kuptimit të fjalës dhe e krahasojnë në mënyrë të mrekullueshme me një fjalë shqipe dhe kështu që arijnë ta zëvendësojnë atë. Psh shumë vetë përdorin fjalën italiane prezantoj që në shqip nuk do të thotë asgjë tjetër veçse paraqes psh. prezantoj një plan të ri = paraqes një plan të ri, ose prezantoj këngëtarin = paraqes këngëtarin ose prezantoj shokun apo shoqen = paraqes shokun apo shoqen. Megjithatë shumë njërëz përdorin fjalën prezantoj pasi mendojnë se nuk ekziston në shqip ose për faktin se ashtu e kanë dëgjuar nga të tjerët ose ngase u duken më të bukura. Ata që përdorin fjalë të huaja nuk bëjnë gjë tjetër veçse flasin shqip me fjalë jo shqipe. Është njëlloj si të flasësh italisht me fjalë kinezçe, ruse gjermane etj.

E metë tjetër e gjuhës shqipe është edhe mungesa e shumësit, e kohëve apo të vetave të ndryshme ose të larmishme të fjalëve, psh marim fjalën Ski. Kemi Ski por për të treguar se çfarë bëhet me ski ne duhet ta përshkruajmë me disa fjalë dhe që prap nuk janë të sakta psh bëj ski. Kjo mund të kuptohet edhe si prodhoj ski ose fabrikojë ski. Fjala bëj nuk ka lidhje me ecjen, udhëtimin apo lëvizjen. Do ishte njëlloj sikur në vënd të fjalës udhëtoj me makinë të thoshim bëj makinë. Në lidhje me shumësin marim fjalën vjehër ose vjehrë (babai ose nëna e nuses apo djalit) të cilat janë në numrin njëjës. Këtyre fjalëve në gjuhën zyrtare u mungon shumësi. Këto fjalë mund të kthehen në shumës vetëm në variantin prindërit e nuses apo prindërit e djalit ndërsa varianti i vërtetë mungon. Ne nuk mund të themi vjehrit apo vjehrat pasi kjo mungon në librin zyrtar të gjuhës shqipe. Shumë njërëz do të thoshin "këto janë vogëlsira dhe të panevojshme pasi ne e kuptojmë se çfarë do të thotë ai që flet", mirëpo kjo sjell mos shprehjen e saktë por të përafërt si dhe përkufizimin e gjuhës dhe si rrjedhojë pas disa shekujsh gjuha do të ketë boshllëqe serioze dhe nuk do të jetë më e përdorshme (ato kthehen në të papërdorshme) dhe kështu që do të zhduket. Nga historia dimë se mijra gjuhë janë tretur ndër shekuj dhe janë holluar aq shumë saqë tani disa terma aty këtu i mbahen mënd ose janë zhdukur plotësishtë dhe fakte ka me mijra. Psh për një garazhist shqiptar gjuha shqipe nuk është e domosdoshme pasi të gjitha pjesët e makinës thuhen italisht (pedal, sendile, marsh, indjetro, motor, buzhi, fren, makinë, tapiceri, sotokart, balestra, garazhd, garazhist ... etj) ndërsa në Kosovë thuhen sërbisht me përjashtim të makinës vetë që atje quhet kërr. Dje ishin pjesët e makinës, ndërsa sotë ato të kompjuterit dhe nesër të atyre që s'janë shpikur akoma dhe nga përllogaritë në rast se ecet kështu pas tre shekujsh shqip do të flitet vetëm brënda në shtëpi me prindërit dhe gjyshërit (me anë të disa foljeve bazë si punë, ha, pi, iki, vijë, shikoj, fle, ujë, dëgjoj, bëj ... etj) pasi jasht sajë në punë do të jenë fjalët e huaja të nevojshme dhe të domosdoshme.

Profesorët e gjuhëve të tjera i kapin që në fillim këto probleme dhe e pasurojnë terminologjinë e gjuhëve tyre me fjalë të reja që në fillim, kështu që ato pranohen me shpejtësi nga populli. Ato publikohen gjithashtu në mënyra të ndryshme shumë shpejtë me anë të librave, cd-room, gazetave, broshurave, internetit etj me çmime të arsyeshëm. Dalin gjithashtu rregullisht libra të Gjuhës Zyrtare dhe çdo institucion shtetëror është i detyruar të shkruajë gjuhën zyrtare nëpër të gjitha shkresat, ndryshe ajo meret si paaftësi e punonjësit zyrtar. Ndërsa në Shqipëri dokumentat zyrtare shkruhen në mënyrë të tmershme si të shkruajtura nga pjanecë apo pjanece. Aty përfshihen çertifikata lindje, dëshmi të ndryshme, shkresa ministrie, bashkie, noterësh, ato të prokurorisë, gjykatës etj, gjë e cila është e pamundur të vihet re në vëndet e zhvilluara ku dhe tek një nënpunës i thjeshtë pularie nuk mund të gjesh gabime drejtëshkrimore apo të shkruajtura pa edukatë, pisë, të pakuptueshme, të parregullt, me vula e firma atje ku nuk duhet etj.

Për ato që ne jemi të zotë ne kemi dhe fjalor të pasur dhe mund të shprehemi lirisht dhe saktë si dhe në variante të ndryshme. Kjo në sajë të vet popullit dhe jo të "studiuesve të akademisë së tiranës". Psh për të sharë dhe mallkuar në shqip mund të shprehesh aq mirë sa në pothuajse asnjë gjuhë tjetër në botë. Rusët kanë një libër sharjesh dhe mënyrash sharjesh prej rreth njëqin faqesh, mirëpo aty janë përafësisht të njëjtat sharje por në variante të ndryshme (librin mund ta gjeni ose porosisni në çdo librari të evropës perëndimore). Në shqip mund të shkruhet një libër i tillë tre ose katër herë më i madh nëse shkruhet në të njëjtin variant. Kush di italisht, anglisht, gjermanisht, frëngjisht etj nëse do ti duhej të përkthente një sharje shqip qoftë ky dhe përkthyes me diplomë nuk do mund ta përkthente saktë atë. Për arsye se kemi një bazë të mirë në këtë lëmi fjalët e reja që dalin nga vetë populli janë të pranueshme dhe mjaft të përdorëshme në krahina të caktuara. Psh në Berat përdoren fjalë të reja si: llogaçe = njeri i ulët ose fundërinë, legen dhe lamash = njeri jo i fjalës i ulët dhe dredharak.

Së shpejti do të gjeni këtu fjalë të huaja që përdoren në shqip në kuptimin e tyre të saktë Shqip. Kështu që ata që dëshirojnë të flasin shqip me fjalë shqipe do mund të këshillohen tek kjo faqe për një numër të vogël fjalësh të huaja që mund të zëvendësohen.

Nëse dhe ju jeni i interesuar mund të publikoni këtu fjalët që juve vetë ju kujtohen dhe që mund ti zëvendësoni, me kusht që zëvendësimi të jetë i saktë. Ato mund ti dërgoni me e-mail ose në rast se nuk e keni duke klikuar në butonin e vogël në faqen kryesore në qëndër ku lexon: My Homepagina dhe poshtë ICQ, Chat, ExpressMail.

S. Xhardo