-Kur u themelua skuadra Kosova dhe pse zgjodhët emrin e Kosovës për këtë skuadër futbolli?

Skuadra Kosova mbush 10 vjet nga dita e themelimit të saj. Në vitin 1989 ekzistonte skuadra e futbollit Albania, ku unë luaja dhe isha asistent trajner. Asaj kohe, në Kryesinë e kësaj skuadre ndodhën disa ngjarje (padrejtësi në lidhje me këtë ekip) dhe unë meqënëse isha i apasionuar me futbollin dhe duke parë që asgjë nuk mund të ndryshonte, me gjithë këmbënguljet e mia, vendosa që të themeloj një ekip futbolli (kjo më tepër për hobi). 

Por, nuk duhet harruar që terrori i policisë serbe mbi popullin shqipëtar të Kosovës, asaj kohe, kishte arritur kulmin. Meqenëse stafi politik shqipëtar po punonte me gjithë mënyrat për bërë të njohur dramën e popullit shqipëtar të Kosovës, unë së bashku me kolegun tim Lulzim Kallaba vendosëm që skuadrën e re të futbollit ta quanim “Kosova”.

-Duke e emëruar ‘Kosova’ këtë skuadër sot, pas 10 vjetësh, a mendoni se ia keni arritur qëllimit? -Para 10 vjetësh, shumë kanadezë nuk e kishin dëgjuar kurrë emrin Kosovë. Shumë herë na qëllonte të sqaronim njerëz që Kosova është një pjesë e Shqipërisë, e shkëputur me forcë nga trungu mëmë; që atje popullsia është 98% e pastër shqipëtare; që kjo pjesë e tokës Shqipëtare është e pushtuar nga Serbia, ku shkilen edhe liritë e të drejtat më elementare të njeriut. Dalëngadalë, shumë sportdashës kanadezë filluan të njiheshin me emrin e Kosovës; kjo kryesisht kur skuadra jonë filloi të korrë suksese të njëpasnjëshme.

-Çfarë suksesesh?

-Në vitin 1992 fituam për herë të parë titullin Kampion pasi mundëm në finale skuadra e futbollit Italia. Në 1993 përsëri fituam titullin Kampion pasi mundëm në finale skuadrën Angleze ‘Glen Forest’ dhe këtë kupë ia dorëzuam Kryesisë së Komunitetit Shqipëtaro-Kanadez (asaj kohe kryetar ishte z. Halit Hoxha). Në 1994 në Richmont Hill morën pjesë 32 shtete; ne fituam, në grupin tonë, duke mundur Italinë, Kanadanë dhe Iranin. 

Po atë vit u mbajt turneu Kroat ku morën pjesë dhjetë ekipe kroate, dy nga Bosnja, një Italiane dhe skuadra Kosova. Për herë të parë në historinë e këtij turneu doli fituese një skuadër jo Kroate dhe kjo ishte ‘Kosova’; rrahëm në finale skuadrën e Zagrepit me rezultatin 2-0 dhe në finale Kroacinë 3-1. Në këtë turne skuadra jonë mori trufeun dhe një shumë të hollash; këto të fundit i dërguam për fëmijët e Bosnjes (asaj kohe Bosnja ishte në luftë). Në 1995 skuadra Kosova u regjistrua në Legën e parë kanadeze (Canadian National Soccer Leg) ku dolëm nënkampion; në këtë sezon, me ne luajti edhe lojtari i njohur shqipëtar i Toronto Maple Leaf, Tahir Domi.

Në 1996 dolëm në Legën e parë dhe fituam Kupën e Kanadasë. Në 1998, në Kanada, u mbajtën 4 turne. Skuadra futbollistike Kosova doli kampione në 3 prej tyre, ndërsa në njërën doli skuadra Portugale. 

Në 1999, në London (ON), u zhvillua Kampionati i skuadrave futbollistike më të mira në Ontario. Ne dolëm nënkampion (kampione doli Portugalia).

Sivjet, në Maj 2000, ne dolëm përsëri Kampion i Kampionatit Botëror (Word Cap. Indo) ku morën pjesë 36 shtete (komunitete të Kanadasë) ku fituam në finale me Portugalin, 1-0.

Këto janë fitoret më të rëndësishme; më pak të rëndësishme janë me dhjetëra!  

-Në këto 10 vjet karrierë, a keni patur mbështetjen e bashkëatdhetarëve? Mendoj se që të mbash një skuadër të tillë duhet edhe kontribut i madh financiar.

-Në radhë të parë, përfitoj nga rasti të përshëndes sportdashësit e mrekullueshëm shqipëtarë të cilët nuk na kanë lënë kurrë vetëm. Madje, për këtë mund të flasin më mirë organizatorët e legave të ndryshme, pasi kur ka luajtur skuadra Kosova kanë shitur maksimumin e biletave (në shumicën e rasteve ka patur edhe një numër të madh tifozësh jo shqipëtarë, që vinin nga qytete të ndryshme të Ontarios për të parë lojën).

Përsa i takon anës financiare, nëse nuk gaboj, ua thashë në fillim që unë jam i apasionuar i futbollit. Kur skuadra jonë mori “ngjyrë politiko-kombëtare” duke mbajtur mbi supe emrin e Kosovës, gjërat u panë ndryshe nga unë. 

Vitet e para të ardhjes sime në Kanada punova në ndërtim dhe me ato para mbana familjen dhe mbulona shpenzimet e nevojshme të skuadrës, pasi nuk mund t’ia lejoja vetes që skuadra Kosova të mos ia arrinte qëllimit për të cilin u themelua. Por, nuk mund të lë pa përmendur edhe kontributin e disa bashkëatdhetarëve, konkretisht pronarin e Restorant Red Flame, z.Sadem Hyseni, (kryetar i kësaj skuadre në 1994; komunitetin Shqipëtaro-Kanadez që më 1995 dha një kontribut finaciar prej $3000; z.Gani Mani i cili dha një kontribut prej $5000 (gjithashtu, një vit kryetar i skuadrës Kosova; zotërinjtë Ferzi Beqiri, Afrim Gashi, Gjergj Nikolla, etj.

-Ju thatë që me skuadrën Kosova ka luajtur i famëshmi Tahir Domi. Në 10 vjet veprimtari, a keni patur lojtarë të tjerë të njohur?

-Tomas Radzinski, lojtar i famshëm Polak, i cili sot luan me ekipin Europian të Belgjikës; Anderlehti, i cili mbajti për 3 vjet kostumin skuadrës Kosova, i cili luajti me ne kundër Maqedonisë (dje pas një muaji bëri kontratën me skuadrën Belge). Dy lojtarë të njohur Kroatë të Velezhi i Mastarit; Dubravko Lediç, i cili ka luajtur edhe për Kom. e Jugosllavisë dhe Zoran Marijanoviç (Maki), i cili ka 10 vjet që mban fanellën kuq e zi. Martin Dugas, irlandez, i cili momentalisht luan në legën e 2-të të Hollandës. Llallo Maradona, vëllai i Diego Maradona, ka shprehur vetë dëshirën që të luajë për skuadrën Shqipëtare Kosova.

Momentalisht, sk. Kosova ka 98% lojtarë shqipëtarë, shumica e tyre nga Shqipëria të cilët kanë luajtur me kombëtaren e të rinjëve të Shqipërisë: Altini, Dritani, Carçani, Ryta, Popa, Isa, Murati, Dervishi, Manja, Tafai, Fitimi, Denisi, Albi, Ardiani.

-Ndonjë ndeshje që e veçoni nga të tjerat?

Po. Më 1999, në London (On); në gjysëm - finale na ra të ndesheshim me Serbinë. Para ndeshjes ne të gjtthë, si skuadër, vendosëm që nëqoftë se humbisnim do të ktheheshim në Toronto në këmbë (200km). Kjo ishte ndeshja më e nxehtë e gjithë historisë së sk Kosova. Një numër i madh shikuesish ishin jo shqipëtarë të cilët, të sensibilizuar nga situata në Kosovë, filluan të thërrasin KLA (UCK-ja). 

Madje, njëri erdhi dhe kërkoi të dinte pse nuk ishte shkuajtur në fanella, së bashku me emri Kosova, edhe UCK, por kjo nuk u pranua nga organizatorët e Kampionatit. Pasi merrej si provokim kjo ndeshje u mbyll me rezultatin 4-0 për ne. Në 5 min. e fundit të lojës urdhërova që të mos bëheshin më gola, por të talleshin me lojtarët e s.f. Serbia dhe, me të vërtetë, ata u bënë qesharakë para publikut të shumtë të pranishëm në këtë ndeshje. Kur filloi karrierën s.f. Kosova filloi nga zero, Kroacia ishte ekipi më i mirë në Kanada, por më 1996 ndodhi një befasi e madhe, (për këtë kërkoj falje sportdashësve shqipëtarë). Menaxheri i skuadrës Kroate më bëri një ditë tel dhe kërkoi nga unë që ndeshja e radhës që kishn me ne  të dilte barazim, sepse më tha ai në qoftë se humbas këtë ndeshje koka ime shkon, unë humbas të drejtën të drejtoj skuadrën Kroate.

Ai më tha që ofronte një shumë të madhe të hollash për këtë kompromis. Unë i’u përgjigja: ‘Sa për të holla nuk besoj se ekziston ndonjë shumë që barazohet me emrin e Kosovës, por meqenëse s.f. Kroate na ka përkrahur gjithmonë dhe meqë kjo ndeshje ne nuk na dëmtonte (pasi ishim në krye të tabelës) ndërsa kroatëve barazimi i shpëtonte menaxherin. Për këtë pranova që kjo ndeshje të dalë barazim. Kjo më shkaktoi probleme me tranjerin tim (Spanjol). Pjesa e parë përfundoi 3-0 për ne, pjesa e dytë filloi 4-0; si përfundim, ndeshja mbaroi 4-4. Shikuesit shqipëtarë e kuptuan që unë kisha bërë kompromis dhe disa prej tyre më ofenduan me fjalë shumë të rënda. Ajo që dua të them është se skuadra më e fortë deri atë kohë po na lutej ne për kompromis.

-Çfarë keni në plan për të ardhmen?

Vitin që vjen kam dëshirë që s.f. Kosova t’a regjistroj në Canadian Professional Soccer Liege, regjistrim i cili duhet bërë sa më shpejt (brënda Shtatorit). Për këtë duhet një mbështetje e fortë finaciare, prandaj po kërkoj disa persona (ata që duan që emri i Kosovës të ngrihet sa më lart) që bashkë me mua të sigurojmë shumën e detyrueshme për këtë qëllim. Po jap numrin e telefonit që të interesuarit të mund të kontaktohen me mua (905) 891-7061; Cell: (416) 520-0489.  

Intervistoi Fatmir DOGA

 Tahir Domi
Më i famshmi sportist Shqipëtarë në Kanada

www.tiedomi.com